E sapu ta tristu, pasobra solo no kier sali. Ousensia di solo den e pintura di artista lokal Diana Rueda ta sklama pa atenshon. Kasi bo por tende su ousensia. Un nubia skur ta skonde e berdat.
E nubia skur ta e desunion i odio profundo ku a nubla nos polítika pa años kaba. En bes di profilá nan propio programa i kandidatonan na un manera positivo, nos polítikonan ta blo buska eror i debilidat den nan oponentenan, pa dal nan kuné mas duru posibel. Tur kos ta pèrmití: ridikulisá, ofendé, insinuá, piki pieu, nenga bèrdat, saka mentira òf papia mitar bèrdat. Danki Dios ku te ainda violensia a keda afó.
Tin algun hende ta gusta e porkerianan aki, pero gran mayoria di pueblo ta wal di dje i ta desgustá di tur partido. Ta tempu pa rekonsiliashon, espesífikamente ora ta toka futuro di Boneiru. Nos mester wak pa nos haña e mihó deal posibel di Hulanda. Nos mester uni pa logr’é.
