Mensahe no. 2 di Fundashon GMS (Golden Meand Society)
SVB di Kòrsou a kòrta AOV di tur penshonado ku ta biba na Boneiru ku 10%. Esei ta e tristu realidat ku mas òf ménos 344 penshonado bibando na Boneiru a wòrdu konfrontá kuné for di yanüari 2017. Nan no a risibí nan Kerstbonus di aña pasá tampoko.
Esaki ta algu hopi serio, pasobra si Kòrsou por hasi esaki kontra penshonadonan na Boneiru, e ora ei Boneiru tambe por hasi’é kontra penshonadonan na Kòrsou. Anto e ora ei Kòrsou y Boneiru ta bira enemigu, algu ku mester prevení. Nos islanan a separá for di otro di bèrdat, pero e amistat entre nos pueblonan no mag bai pèrdí.
Ademas, si SVB di Kòrsou por hasi esaki, kiko ta stòp nan pa otro aña kòrta AOV ku 20%? Y despues 30%? Ta p’esei Fundashon GMS (Golden Meand Society) a lanta un kaso kontra SVB-Kòrsou, pidiendo Korte pa ordená SVB pa sigui paga AOV sin kòrta nada. E kaso aki a haña sosten di un Asosashon ku yama VAC (Vereniging AOV-Belangen Curaçao). Presidente di VAC ta Sr. John Heldewier, sekretario Sr. Max (Chòn) Theodora y tesorero Sr. Alvin Trinidad.
E kaso ta pendiente awor aki, pero nos a sugerí pa Gobièrnu di Boneiru skirbi un karta na Gobièrnu di Kòrsou pa pidi aklarashon. Anto mesora dip. Nina den Heyer a aktuá riba esaki. El a papia ku nos y un 2 siman despues BC di Boneiru a manda e karta. E karta asta a bai na gobièrnunan di Aruba, SXM, Saba y Statia tambe, pasobra ayanan tambe tin hopi penshonado ku tin mesun problema. Pues e otro islanan tambe por disidí di manda un karta similar.
Nos ta apresiá e aktuashon desisivo di Sra. Nina den Heyer. E no a basilá. El a aktuá mesora, saliendo na defensa di e grupo di penshonadonan aki y pa evitá enemistat entre nos islanan. Mara gobièrnu por a aktuá asina tur ora! Ora un persona meresé honor, mester dun’é. Danki dip. den Heyer pa e sosten balioso pa e kousa aki. Ban sigui traha huntu pa koregí e eror aki.
Ya 7 kaso a wòrdu hibá bou di ouspisio di Fundashon GMS. Kualkier persona interesá por lesa tur detaye di nan na www.arcocarib.com Riba front page di e website aki lo bo mira e titulo: ‘GMS PENDING COURT CASES’. Si bo klik riba kualkier di e kasonan, bo ta bai dirèkt na e kaso konserní. E kaso aki ta ‘Sixth GMS Court Case’.
Bonaire, 26 yüni 2017
Pa Fundashon GMS
Michiel Bijkerk