SIGURIDAT KOMO MEDIO PA SKONDE INFILTRASHON



Di dies Karta Habrí na Poder Hudisial

NOS LO NO KEDA ZUEIF NA INDIA. Pero hasta pa nos na Boneiru ta bon pa buska lus kaminda e ta bria. Algun siman pasá e Parlamento di India a pasa un lei dunando gobièrnu influensia riba nombramentu di huesnan.

Totalmente demokrátiko, nò? Ta un lei? Awèl, Korte Supremo di India ta pensa otro. Nan a para gobièrnu. Nan a chèk e lei ku Grondwet y a deklar’é nulo!

Pues Korte a para e peliger pa gobièrnu haña influensia riba nombramentu di huesnan. A tira e lei ei den bak’i sushi! Esei por parse anti-demokrátiko, pasobra e lei t’ei. Pero Korte di India a kibr’é tòg. Pasobra e lei konserní ta violá Grondwet, ku ta preskribí ku poder hudisial ta y mester keda independiente y imparsial. Esei ta un parti esensial di e sistema di separashon di podernan den kualkier demokrasia. Si gobièrnu ta haña influensia riba nombramentu di huesnan, agèndanan polítiko lo drenta sala di korte sin nota. Y esei no ta akseptabel.

TÒG EL A SOSODÉ NA HULANDA KABA! Promé a bini e asina yamá ‘Raad voor de Rechtspraak’, ku a duna gobièrnu influensia indirekto riba poder hudisial. Ex P-G Hartkamp na Korte Supremo di Hulanda a mustra riba esaki (mira nos Promé Karta Habrí “E Gòlpi di Estado Sekreto Infiltrando Mundu Oksidental”).

Despues a bini e AIVD (es desir, e ‘CIA’ di Hulanda). Nos no tin prueba di esei ainda. Pero, paga tinu! Den práktika e ta bai mas òf ménos asina aki.

Sierto huristanan (miembronan di OM, huesnan òf abogadonan) ta duna informashon na AIVD. Si un sierto kaso por forma un peliger pa ‘siguridat’, AIVD ta informá Presidente di Korte, por ehèmpel. Resultado: un desishon di Korte inkomprendibel. Nos no ta referí aki na e hecho ku AIVD por ta lesando e e-mailnan di sierto abogado- òf huesnan ‘sospechoso’ y ku kisas ta skuchando nan telefòn. Nos ta konsiderá esei probabel. Pero laga esei un banda.

NOS TA REFERÍ NA SIGURIDAT komo medio pa tapa e Gòlpi di Estado Sekreto. Un ehèmpel lo demostrá kon fásil e ta pa infiltrá poder hudisial usando e palabra mágiko di ‘siguridat’.

Outor di e artíkulo aki tabatin e privilegio di por a traha 4 luna komo diputado na Boneiru. Un amtenar a haña retiro. El a splika entre otro e diputado nobo ku no tabatin niun motibu hustifiká pa su retiro. Despues di a studia su fail a yega na e konklushon ku e amtenar tabatin rason. Pues a tuma e desishon pa dun’é su trabou bèk. Pero Gezaghebber tabata protestá enérgikamente kontra esaki, ounke su argumentonan tabata fofo pa no bisa ridíkulo.

Ta p’esei e amtenar a haña su trabou bèk apesar di e protestanan di Gezag. DESPUES Gezag a splika nos ku a duna e amtenar retiro pa motibunan di SIGURIDAT. Ora a pidi Gezag den ki sentido presis e amtenar aki tabata forma un peliger pa siguridat, el a kontestá ku e no por a bisa, pasobra esei mester a keda sekreto! Pues te dia di awe nos no sa.

Mientrastantu 4 aña a pasa, anto e amtenar konserní ainda no a bula Boneiru. Asina nos ta mira kon fásil ta pa usa ‘siguridat’ komo medio pa infiltrá den gobièrnu.

TEMPU DI GUERA. Nos tin ku komprondé ku nos ta den Guera. E guera aki ta ASIMÉTRIKO. Ta hib’é na tur sorto di manera: ekonómiko (sanshon, soborno y ‘economic hit jobs’), monetario, polítiko (aliansanan y isolashon), militar (‘proxy wars’), informátika (spionahe y almasenamentu masal di informashon), teknológiko (‘drones’, armanan den espasio), media (propaganda y ‘media hit jobs’) y hasta spiritual (stekmentu di fanátikonan religioso).

Nos no a realisá ku e Terser Guera Mundial ya a kuminsá kaba, pasobra ta hib’é na un forma asimétriko. Totalmente diferente ku ántes. Un Era Nobo, un tipo di guera nobo.

Y e preshon di guera ta hustifiká uso di SIGURIDAT komo medio pa infiltrá tur kaminda y dirigí tur kos via di e kanalnan ei. Poder hudisial no por ta un eksepshon. Esaki ta splika di kon Korte ta dikta fayonan straño tin biaha, ounke tin otro motibunan tambe naturalmente.

Nos no ta ofresé prueba di loke nos ta skirbi akinan. Nos NO tin prueba. Nos ta analisá a base di sierto indikashon- y señalnan. Y esnan ku sí tin e pruebanan no mag papia. Pasobra tur esaki mester keda sekreto!

Nos Kortenan NO mester tolerá e práktikanan aki y kore ku kualkier forma di infiltrashon resolutamente. Manera Korte di India a hasi. E stándart pa nos Korte mester ta demokrasia y derecho humano. Nada otro.

Boneiru, 30 di òktober 2015
Michiel Bijkerk, abogado