Formalmente for di 8 di Aprel 2005 e Pueblo di Kòrsou ta den un proseso di transishon. Tur partner, ku probabel eksepshon di Aruba, tin un deseo profundo di “reshuffl e” e relashonnan (estatal) den Reino. Banda di esaki, serka e pueblo di Kòrsou tin un deseo di kambia nos manera di goberná e isla di tal manera ku nos lo no ripití e fayonan di último 25 aña ku a pone ku - pa motibu di défisitnan finansiero enorme - e isla no tin espasio pa ahustá maneho mas. Si no tin espasio
pa por ahustá maneho, ki sentido tin pa vota i kambia gobièrnu? Gobernashon a para bira un “stoelendans” pa benefisiá eksklusivamente polítikonan i nan amigunan, sin ku e pueblo en general ta sinti un kambio den maneho na su benefisio.
Den esaki, alivio di e debe ku kasi 4 miyar (e mayoria grandi) ta un paso grandi dilanti.
E alivio ta den forma ku Reino Hulandes (den e kaso aki pagadó di belasting Hulandes) ta bai tuma e responsabilidat (di kapital i interes) over ku e kondishon ku esaki ta bai kombiná ku un kòntròl di gastunan di gobernashon den futuro Entre otro mester pensa aki den debe serka fondo di AOV, SVB, Postspaarbank, APNA i otro fondonan di Penshun, Hospital i kompanianan en general. E ehersisio di mas aña aki lo mester duna e gobièrnunan strukturalmente mas espasio pa ahustá maneho, ku den e situashon ku Kòrsou ta aden aworakí no tin. Nos demokrasia ta haña espasio pa por traha mihó.
E proseso di akomodá nos mes den un bachi di Reino Hulandes nobo, al final lo tuma un mínimo di 44 luna i a bin ta eksihí mashá hopi atenshon di públiko, si mantené e fecha dezèmber 2008 komo fin di e ehersisio.
Den e temporada ei tabata tin un tendensia di kere ku mundu ta drai rònt di Kòrsou i Reino. Pero den e mesun 3 aña i piku, den mundu pafó di Reino tambe tin frikshonnan grandi di ahuste ta tumando lugá ku lo tin infl uenshanan drástiko i permanente riba e manera ku nos ta biba riba e isla, ku otro i ku mundu.
E reto pa 2008 ta pa den kestion di Struktura Estatal, ku mester ta un proseso mas demokrátiko posibel, inkluí deseonan di minorianan sin pèrdè for di bista loke e mayoria a vota p’é. Banda di e reto interno den Reino tin e reto internashonal ku ta konfrontando nos i ta pidiendo mes òf mas tantu interes pa por garantisá un bienestar soshal i ekonómiko kontinuo pa nos tur.