Di diesun Karta Habrí na Poder Hudisial
META PRINSIPAL di Polítika ta pa hisa nivel spiritual y material di pueblo, den harmonia ku Naturalesa. Nos a pèrdè e meta prinsipal aki. Via di su verediktonan Korte por trese e meta aki bèk.
Hisamentu di nivel spiritual di pueblo no ta enserá un kiebro ku e prinsipio di separashon entre Estado y Religion. Esei tin ku keda. Pero e separashon ei no ta preskribí un Estado sin Dios y sin Balornan. E ta nifiká solamente ku Poder di Estado mester ta imparsial.
Ta p’esei Estado ta promové TUR religion sin distinshon, inkluso Ateismo. Y Estado ta perkurá ku entre nan e diferente religionnan no ta diskriminá kontra otro tampoko.
REMARKE NA BANDA. Ta eksistí religionnan òf kultonan klaramente satániko ku ta stek hende pa bai guera y ku ta reforsá tur emoshon negativo, manera odio, rabia, envidia, codicia y plaser den matansa di hende. Estado mester demaskará y kontrolá nan.
Despues nan lo destruí nan mes.
E tipo di hende y grupo semper lo t’ei. Nos tin ku komprondé ku emoshonnan positivo no por eksistí sin esnan negativo. Nos por focus riba emoshonnan positivo y esei ta bon. Pero no ta posibel pa destruí negativismo, pasobra si bo ta hasi esei, positivismo tambe ta disparsé.
Por ehèmpel. Si nos por a destruí odio, e ora ei amor tampoko lo no por eksistí mas.
Ta p’esei kòntròl di negativismo ta e máksimo ku nos por logra.
SÍ TA POSIBEL pa focus riba positivismo asina intenso y largu ku bo no por kai bèk den negativismo mas. Esei ta un proseso hopi largu. Ta tuma hopi enkarnashon pa logr’é. Òf hopi generashon, si bo no ta akseptá e lei natural di re-enkarnashon. En realidat tur dos, hopi enkarnashon y generashon.
Nos no por prueba e ponensianan aki, pero nan ta forma – huntu ku promoshon di étika – e Meta Prinsipal di Religion.
KORTE ta promové y ta defendé Hustisia y demokrasia via di kasonan individual y ta hisa nivel di ambos kontinuamente. Esaki ta e Meta Prinsipal di Korte. Esaki ta enserá rekonosementu y implementashon di demokrasia ekonómiko tambe (esta: derechonan soshal y ekonómiko).
Ehèmpel. Den e kaso di ‘Grootboom’, Korte Konstitushonal di Zuid-Afrika a ordená Estado pa TUMA MEDIDA Y HASTA PA PASA UN LEI PA “devise and implement a comprehensive and coordinated program to realize progressively the right of access to adequate housing, including the obligation to devise, fund, implement and supervise measures to provide relief to those in desperate need within its available resources” (resúmen di e desishon).
“HASI’É!”, Korte a bisa. Stòp di papia. Derechonan ekonómiko no t’ei pa prèt! Na Zuid-Afrika a inkluí e derecho riba un kas desente ‘adequate housing’ den Konstitushon.
Serka nos e derecho aki ta ankrá den un Tratado ku ta na vigor pa BES.
Tumando e kaso di Palu Grandi aki komo ehèmpel, por konsiderá di lanta un kaso na Boneiru pa pidi Korte pa ordená Hulanda pa para garantia pa FCB por haña un fiansa di banko pa traha 500 te 1.000 kas di pueblo. E Banko ta dispuesto, pero Hulanda no kier para garantia.
Otro alternativa ta pa lanta un kaso pa pidi Korte pa ordená gobièrnu di Boneiru (OLB) pa buska un fiansa di Hulanda a base di art. 89 di e Lei ‘FinBES’. E artíkulo aki ta habri kaminda pa OLB por haña un fiansa di Hulanda kontra 0% di interes pa obranan públiko. Bibienda públiko ta un obra públiko, pues Boneiru por haña e fiansa aki.
SEÑORES Y SEÑORAS HUESNAN. Si boso no ta aktua, niun hende lo aktua. Pa añanan kaba tur hende ta papia, pero kasnan no ta wòrdu trahá. NO pasobra no tin sèn, pero pasobra tin politikeria. Pa motibu di negativismo puro, no tin sufisiente kas di pueblo awor aki ...
Entre paréntesis. Ya dos biaha kaba a pidi boso, nos Huesnan, pa ordená Gobièrnu pa paga hür pa kobradónan di ònderstant na FCB. Pasobra nan tambe tin derecho pa biba den un kas desente. Pero kiko boso a hasi? Unu boso a deklará no-atmisibel. Y e otro boso a rechasá ...
Si Korte ta sigui nenga di stret nos polítikonan, nos lo no por yega hopi leu tampoko ...
Bonaire, 7 novèmber 2015
Michiel Bijkerk, abogado