Segundo Karta Habrí na nos Huesnan
MUNDU por skohe entre 3 alternativa awor. Kisas a skohe pa e segundo opshon kaba. Komo sea, resientemente Putin a pone e opshon nuklear riba mesa. Mester bisa aserka ku el a hasi esei DESPUES ku Merka a anunsiá ku nan lo bai stashoná armanan pisá na Polonia.
Kisas e krísis ekonómiko ta bin promé. Y kisas e Terser Guera Mundial lo resultá di esei. Nos no sa. Pero di kon no skohe konsientemente pa e terser opshon? Poder Hudisial tambe por skohe pa Kambio ainda.
HUSTAMENTE nos ta tuma ISIS na malu ku nan ta kometé krueldatnan horibel. Pero pensa. Ta realmente ménos kruel pa ataká hende ku ‘drones’? Y ki dia ISIS lo kuminsá manda ‘drones’ pa nos?
E guera na Irak tabata nesesario di bèrdat? E tabata un guera ‘legal’? Hecho ta ku no a haña Armanan di Destrukshon Masal. Y e konsekuensianan awor ta ISIS y miyones di migrante.
Y kiko Hungria ta hasi awor? Nan kier traha un trankera na frontera ku Sèrbia pa tene e migrantenan afó. Ken por pensa di un mihó ehèmpel di kombatí síntoma ku esaki?
Ta mas ku klaro ku ISIS ta e síntoma di un malesa soshal. Mòslemnan ta mira e inhustisia y a disidí di lanta guera. Den esaki nos NO ta duna nan rason, pero ta komprendibel sí. Nos ta ripití: “Mihó nos haña Guia di Korte ku Rebelion di Pueblo!”
Y ora ISIS ta bisa ku Mundu Oksidental (y Medio Oriente mes tambe, by the way) a kita for di e kaminda hustu y korekto, nan TIN RASON.
Un ehèmpel. Mundu ta gasta mas ku dos shen (200) bes mas tantu na defensa y arma ku Nashonnan Uní ta gasta na Mishonnan pa mantené Pas. Bo ta kere ku e Gòlpi di Estado sekreto di e ‘Militair-Industrieel-Media Complex’ lo por tin algu di haber ku esei? Presidente Eisenhower tabata loko anto? Òf boso tambe, nos Huesnan, a ripará algu akinan?
Y kiko nos mester pensa di tur e hendenan riku ku ta biba tras di muraya y trali? Naturalmente nos no ta di akuerdo ku ladronisia y robo. Pero, wak rònt di boso! Boso no ta mira e diferensia grandi entre riku y pober? Boso a kere ku esei lo por keda asina pa semper sin niun problema nunka? Òf boso a kere ku semper por paga algun hende pober pa protehá boso?
USA boso sintí! E rebeldenan di ISIS a fada y nan wowo a bira skur. Boso a kere ku por tira bòm numa, mata y heridá miyones di hende sin niun reperkushon nunka? Wèl. Awor boso sa e kontesta.
Nos ta kontra ISIS. Pero en bes di bòmbardeá nan, mester ofresé solushon polítiko-ekonómiko.
Demokrasia ta un sistema superior. Pa nada nos no kier pèrd’é. Pero demokrasia polítiko SO no ta solushon. Si na Egipto nan ta introdusí demokrasia, pero pueblo ta sigui yega kas blo bashí manera semper, ki balor demokrasia tin e ora ei?
HENDE mester haña mas sèn den nan saku! Pero si nos na Boneiru ta pidi derechonan soshal/ekonómiko igual, Hulanda ta NENGA di dun’é y boso, nos Huesnan, ta rechasá nos petishon dos biaha, husgando ku no tin nada diskriminatorio den e desigualdat aki.
E ora a yega pa nos tur KUMINSÁ PENSA. Y boso, nos Huesnan, tin e kapasidat y silensio pa pensa riba e kosnan aki. Hasi’é anto!
Y boso tin e poder estatal nesesario tambe pa por intervení den komunidat. Oportunidatnan pa hasi esei lo presentá nan mes. Kasonan lo wòrdu hibá. Pero mester ripití: “Si boso ta sigui laba man, OTRONAN lo NO intervení tampoko”.
Pasobra polítika ta kompletamente pegá. Prinsipio y balornan NO ta guia komunidat mas. Ta kudisia y manipulashon ta guia. Ta rikunan ta dirigí polítika, si nos tin suerte. Òf ta mafia mes, si nos tin mala suerte.
ESAKI ta e segundo Karta Habrí dirigí na Poder Hudisial. Kualkier persona inteligente por mira ku Mundu ta riba un ruta dirèkt pa desaster. Nos ta purba stimulá Poder Hudisial pa aktua na un forma mas asertivo den kasonan kontra gobièrnu.
Kisas ISIS lo no lanta na Mundu oksidental e ora ei. Awe ta 14 di yüli 2015. Kiko tabata e kousa di e Revolushon Franses atrobe?
Bonaire, 14 yüli 2015
Michiel Bijkerk