Un Kòrsou outóktono ta eksistí? Outóktono, outónomo i globalisashon.
Supervishon lo kibra nos idealnan?
Den sierto gremio tin e ansiedat ku un Kòrsou ku ménos debe, pero kombiná ku un Supervishon Finansiero (CFT) pa evitá ku gobièrnu di Kòrsou ta bolbe krea debe ekstravangante komo pais den Reino Hulandes, ta enserá: komprometé un kantidat di ideal manera e Kòrsou outóktono, e Kòrsou outónomo i nos propio identidat.
Mester rekonosé ku e konseptonan ei, kada individuo ta dun’é su propio “zwai” personal. Kada un di e 3 konseptonan ei tin un dinamismo ku bo no por para, sigur ora b’a kis despues di 51 aña, atrobe pa keda bou di Paraplü di Reino. Solamente un porsentahe chikí di e pueblo di Kòrsou a kis pa independensia (5% den último referèndem).
Dekolonisashon
Dekolonisashon estilo bieu ta yegando su fin. Esaki kier men ku nos polítikonan lo no por keda hasi uzo di e chèns di kome for di “dos tayo” ku e bentahanan di dekolonisashon den Reino a duna nan último 50 aña i piku. Esta di hunga badjòng lokal i víktima serka Hulanda al mismo tempu.
Dekolonisashon, despues di 70 aña “by now” ta yegando su fin. Den e 70 aña ei di transishon bo por a saka bo bentaha (komo polítiko di un teritorio kolonisá) di tantu e idea di “ta na kaminda pa independensia” i tene na saya di mama Hulanda pareu.
Kòrsou, stratégikamente situá.
Mihó nos tene nos portal na Europa habrí
Den dos diferente referendum, siendo na final di e era di dekolonisashon, e pueblo riba tur 5 isla di Antia a kis di forma abrumador pa keda bou di e paraplü di Reino.
Kòrsou ta keda den Reino
Kòrsou ta keda parti di Reino, ku mayoria di e fakultatnan ku e pais Antia tabata tin, karakterístikanan kultural di nos mes, pero ku regelgeving di kon nos mester “run” nos “volkshuishouding” etc. A “grandes rasgos” Kòrsou lo sigui segun e malchi Hulandes, pero ku hopi responsabilidat serka e gobernante ku ta serka di e pueblo.
E suerte pa nos kultura ta: ku nos tin míles di kilometer for di Europa i riba esei nos ta un isla, ku ta un èkstra seguro ku bo ta keda ku bo propio idioma, bo muzik, bo sistema Karibense ku mas o ménos e klima ta dikta. Esaki e otro islanan Hulandes den Karibe a bin komprondé i ta sinti nan relativamente trankil i kómodo den e situashon nobo ku nan ta drentando aden, i nan no ta tene un referendum.
Pa loke ta demografia, ku tempu, mayoria di hende lo tin un koló mespel, kabei medio krùl riba e isla i na Hulanda e konsepto “outóktono den Reino Hulandes” lo bai haña un otro zwai.
E kos aki ta sosodiendo kaba den statnan manera Rotterdam (aki 5 aña mayoria di hende den e stat ei lo no ta outóktono segun definishonnan vigente na Hulanda).
Nos ta kere ku e porsentahe di pueblo ku te ainda ta biba den e “split personality” di ku é tin un derecho mayó riba e baranka aki, mas ku esun spañó òf hulandes (ni maske su mes antepasadonan tampoko nunka no tabata outóktono di e baranka aki), lo bai pa olvido.
Only time will tell.
Atrobe, e era di dekolonisashon estilo di ántes ta yegando su final.
Òf bo ta kis pa integrá den mundu, òf bo ta kis pa independensia (i e konsepto di independensia tambe ta kambiando rápido den tempu). Den nos situashon spesífiko
“on the long run” un tipo di inter-dependensia pisá lo ta probablemente e stashon final. E otro 5 partnernan den
Karibe (inkluso Aruba) a bin realisá esei, i nan polítikonan ta trahando den e direkshon ei pa nan pueblo.
‘Nation-State’ ta moribundo
Esaki tanten ku humanidat keda ku e konsepto di “NASHON-ESTADO” komo
vehíkulo pa organisá hende:
-The state is a political and geopolitical entity;
-The nation is a cultural and/or ethnic en-tity (chèk: http://en.wikipedia.org/wiki/ Nation-State pa mas info).
Un ehèmpel hopi konfliktivo den esaki ta Irak, kaminda Merka a tribi di invadí.
Tin sabionan ta premirá ku e konsepto di “Nation-State”, aki 100 aña òf ménos, tampoko lo no eksistí mas. Lo bin un “Clash entre sivilisashonnan” promé, ku nesesariamente lo no mester ta violento. Loke ta sigur ta ku lo bin un órden polítiko nobo na mundu.
E siudadanonan di nos hermana-islanan konsientemente of sup-konsientemente ya a bin komprondé e dinámika aki den Reino, i a relahá den e situashon ku, mas ku ántes, ta bai tin mas konkordansia entre e partnernan den Reino ku probablemente tin ku “deal” kuné riba nivel di polítika lokal. Nan (islanan BES i SxM) ta pensa ku nan i Hulanda lo tin di bai adaptá nan mes na situashonnan nobo den Reino ku “de bes en kuando” por trese sierto iritashon temporal.
Ta hustamente p’esei aki 5 aña tin un re-evaluashon di hinter e situashon estatal nobo aki.
Kisas ta bon ku aki na Kòrsou nos kontemplá riba e echo ku asta un isla manera St. Maarten kaminda mas ku 20% a vota pa bira independiente, a vota pro e slotverklaring pa asina sigui bai bòrda, pa al final yega na un Konferensha di Mesa Rondó mas pronto posibel pa trese stabilidat bèk entre e partnernan den Reino.
Ta na Kòrsou komo un di e 7 partnernan, bòltu pa e siguiente blachi i sigui perfekshoná Reino Hulandes òf saka su konklushon, naturalmente dunando e pueblo último palabra via e referendum di dia 15 di Mei 2009 usando informashon korekto i al kaso.
Skirbí pa Lucien Feneta
Nan tur ta ‘Yu di Kòrsou’, un no mas ku e otro. Despues di desmantelashon di Antia nos lo no ta ‘Antiano’ mas. Pero nos tur ta dos kos: 1) Karibeño i 2) Hulandes. Pues nos identidat komun ta ‘Hulandes-Karibeño’ .