Yobe awa, zona dushi
riba daknan di nos kas
Muha tera ku bo gotonan
di pèrla i di eis.
Bo finesa i blankura
ta sin par i sin igual.
Bo dulsura na nos boka
ta un delisia selestial.
Awaseru, gran limpiesa
pa nos kurpa i nos kas.
Bo ta kita ku bo forsa
manchanan sin laga tras.
Bo t’e Tata protektor
pa nos hòfi i mondinan.
Ku bo forsa bo ta yena
blachi, flor i frutanan.
Animalnan ta gritando
di amor i gratitut.
Paranan ta hubilando
den un sierto aktitut.
Honor na bo, o dushi awa,
basha manda hopi flor.
Pa mi ofresé na mi mama
i tambe un pa mi amor.
Cecilia Everts, eskritor Boneriano
E poesia aki a wòrdu poné na músika pa Freddy G. Gumbs & Papi Lomp (ku ayudo di Marlon Wawoe).
Melodia i kanto pa: Freddy G. Gumps