Mi ta supliká Bo Señor
ku mi por spierta un dia
i skucha e kantika di e hendenan
ku a deskubrí e ‘“Amor” .
E dia ku ya nan a lubidá e “Odio”,
guera, rasa i e “Kolor”.
Mi ta spera ku un dia, e mundu nobo
lo bolbe topa su fe den Bo.
Pasobra e bashí ku e mundu ta sinti
solamente Abo por yen’é.
Mi ta buska tambe
na unda Bo ta?
Ora anochi ta baha na mundu
mi ta dirihí mi na Bo,
pero e streanan no ta respondé
na mi preguntanan.
Mi sá ku Bo ta den mi ruman.
Mi sá ku Bo ta bos di mi rumannan.
Mi sá ku Bo tin tur e kolornan.
Mi sá ku Bo ta papia tur idioma di mundu.
Mi sá ku Bo ta den tur nashon.
Mi sá ku Bo nòmber no tin límite den tempu i espasio.
Mi a buska Bo, i awor mi sa na unda,
na unda Bo ta.
Cecilia Everts, eskritor Boneriano