Karta Habrí no. 4 na nos Huesnan
ENTRE DOS STUL bo ta sinta riba suela! Di kon Korte Supremo ta skohe pa sinta riba suela entre Parlamento y Gobièrnu ta inkomprendibel. E ta inkomprendibel, pero iresponsabel tambe. Nos ta rumbo pa un desaster mundial. E ta wòrdu kousá dor di polítika Machiavellista, den kua nos guia NO ta Hustisia, sino Plaka y Poder.
Huesnan ta sufisiente inteligente, eduká y eksperenshá pa por mira e kresiente tendensia fasista den nos komunidat. E ta forma un peliger mortal y ya a kondusí na un guera pa kòntròlá Armanan di Destrukshon Masal ku no tabat’ei mes! Pues a hiba e guera na Irak basá riba un mentira! Su resultado tabata miles y miles di morto- y refugiadonan.
Mientrastantu ya ta hibando otro guera. Loke ISIS ta hasi ta teribel, ounke nan meta ta kla. Nan kier instigá un guera mundial. Y poko poko nan ta logrando. Di otro banda, pa NATO no por tin mihó aliado ku ISIS pa stimulá su programa fasista. NATO mester di ISIS pa hustifiká e proseso lento di destrukshon di demokrasia na kas.
Y DEN TUR ESAKI BOSO, nos huesnan, ta sinta riba suela. Miéntras ku boso tin poder estatal y informashon. Ta p’esei boso no por keda sinta trankil y sigui hasi nada. Ta boso obligashon pa buska un direkshon nobo, pa determiná unda nos tin ku bai y di kon. Boso sa ku opreshon di miyones di hende, ku no sa si nan lo por kome mañan, ta e base ku ta duna ISIS su forsa.
Ta p’esei re-distribushon di rikesa (mihó dicho: re-distribushon di propiedat den Kapital Produktivo) no ta un opshon. E ta nesesario. Pero soshalismo no ta e solushon. Y kapitalismo tampoko, manera a ser probá klaramente. Ambos ta kriminal. Ta p’esei nos ta bisa huesnan: no sigui rechasá kasonan den kua hende ta pidi boso pa trese igualdat y pa korigí diskriminashon.
BÈK NA AÑA 2013. A pidi Korte tres biaha pa ordená gobièrnu pa trata imigrantenan igual ku hendenan lokal. Meta di e kaso tabata pa detenidonan imigrante haña derecho igual ku hendenan lokal riba redukshon di kastigu. Tres biaha boso a rechasá e petishon aki. Tres biaha boso a keda sinta riba suela.
Pa BES por sali eksitoso, derechonan soshal y ekonómiko igual no ta un opshon. E ta nesesario. Dos biaha a pidi boso pa ordená esei. Dos biaha boso a rechasá e petishon. Sirkunstansia ta pone ku awor nos ta pidi’é un biaha mas. Ta di spera ku e biaha aki boso lo lanta for di suela y tuma asiento riba un stul igual ku e otro dos, pero ku un lomba èkstra haltu. Esei realmente ta e stul adekuado pa boso, pero ku boso tin miedu pa sinta riba dje.
KORTE SUPREMO tambe tin miedu di e stul ei. Te aña 2010 kualkier organisashon soshal, sindikal of religioso tabatin e derecho di hiba un Kaso Sivil pa kuestioná legitimidat di kualkier lei dilanti Korte. Pero na 2010 Korte Supremo a para esaki. Hasiendo esaki Korte Supremo no solamente a skohe pa bai sinta riba suela, pero a doblegá y sera su wowo. Mientrastantu e siudadano a pèrdè otro derecho atrobe.
Si kualkier lesadó ta pidi su mes for di unda tur e Kartanan Habrí aki ta bini, nos ta kontestá ku ta 30 aña di eksperensia ku Korte. Huesnan a pèrdè e Kaminda di ántes. Y nan no a haña e Kaminda Nobo ainda. Pero pa hañ’é nan mester buska y tin kurashi. Degradá nan mes, manera Korte Supremo a hasi na aña 2010, lo no solushoná nada. Huesnan por sa y komprondé ku polítika kapitalista y Machiavellista lo trese guera so.
Grondwet NO ta prohibí huesnan pa tuma asiento riba un stul igual entre Parlamento y Gobièrnu. Y pasobra e stul ei ta pará nèt mei mei di e otro dos, Korte tin un bentaha. Mester usa e bentaha aki na un forma prudente y kouteloso. Ta un responsabilidat grave, pero Korte mester kuminsá komprondé su ròl nobo. Si nò, demokrasia lo wòrdu destruí kompletamente sigur. Sin embargo, si Korte ta asumí su responsabilidat, kresementu gradual y pasífiko den direkshon di Sivilisashon ainda ta posibel.
Bonaire, 22 di ougùstùs 2015
Michiel Bijkerk, abogado