DEN KIBRÁ di mainta
un balander a span su bela blanku
den un brisa fresku, fuerte.
Ku firmesa el a balia, kòrta ola
subi laman ganchu.
Esta un espektákulo.
I den mi pensamentu m’a anim’é ...
Bela, bela, mi alma presioso, bela ku vigor.
Bria, bria, bria kue bo destino.
A yega tempu pa bo realisá bo soñonan.
Un dushi emoshon ta karisiá mi alma
i mi ta sigui kontemplá su kaná te ora e kologá
manera un lapi blanku na e rant
kaminda laman ta brasa shelu.
Den esei un hende band’i mi ta babuká:
“Ata! E no t’ei mas!”
... Den nos bista e barku por laga di t’ei, pero
su master, su timon, su kurpa ta mes firme
ku ora el a sali Kralendijk
i e ta mes kapas pa karga su karga
yega su porta di destino.
Ayabanda tin otro wowo ta mir’é yega
i tin hopi bos di alegria ta ward’é:
“Ata! At’é ta bini! At’e ta bini!”
Ta gritu di konsuelo
ku mi ta spera tur otro hende lo tende.
Laman misterioso tin nos islanan separá,
pero no tin forsa posibel pa kibra e union
semper bibu entre Aruba, Kòrsou i Boneiru.
ROBERTO J. JANGA
Kòrsou
Nos a pidi i haña pèrmit di Sr. Roberto Janga pa publiká su poesia - publiká den Amigoe di 9 di yüli 2007 - den ARCO i riba nos website den sekshon di ‘outstanding articles’. Di e forma aki su mensahe, ekspresá na un forma ekselente, lo haña permanensia.
Na promé lugá nos kier a bisa Sr. Janga ku nos a tende su gritu, ‘loud and clear’. No kere, Sr.Janga, ku loke ta pasando aworaki lo keda pa semper. Nos islanan mester sali for di otro pa por superá otro problema. Esei ta un problema eksistenshalista. Un problema ku tin di haber ku e pregunta ta kende nos ta. Abo i ami.
Komo ku nos a biba algun siglo kaba ku diferente tipo di hende huntu riba algun baranka chikitu, nos a desaroyá un kultura miksto, ku ta hasi’é difísil pa nos tur identifiká nos mes kuné 100%. Kasi niun hende por haña su mes kompletamente den nos kultura. Hopi hende sa ku e islanan aki ta nan kas, tòg e Boneriano (‘Bonesario’ na Kòrsou) no ta un Yu di Kòrsou. Anto Yu di Kòrsounan mes tampoko no ta homógeno.
E situashon aki ta forsa nos bira individualista (fuera di nos lasonan familiar, ku normalmente ta fuerte). E eksperimento di un Antia Uní tabata un intento pa superá e problema aki. E no a logra. Otro manera pa superá e problema aki ta pa hasi lo kontrario. En bes di purba krea union den diversidat, nos por selebrá nos diversidat i komprondé ku t’esei mes ta nos kultura. Papiamentu, e ora ei lo no ta e vehíkulo di nos union, sino e vehíkulo di nos diversidat. I eigenlijk asina e ta’ta tur semper. I ta p’esei ARCO ta sali na 4 idioma.