Un sabio Boneriano (no ta nesesario pa menta su nòmber) a splika nos un biaha ku tin dos manera ku un hende por haña un laso íntimo ku un pida di tera. Esun ku tur hende konosé ta pa dera lombrishi di e beibi den tera kaminda el a nase. Asina ta ku hende ku a nase na Boneiru ta bisa ku nan lombrishi ta derá akinan. E ta nifiká ku e persona ei ta un oneriano ‘legítimo’, es desir outóktono, manera nan ta bisa na Hulanda (‘autochtoon’)
Tira lombrishi
Otro manera pa bira un Boneriano
‘legítimo’ òf ‘outóktono’ ta pa ‘tira bo lombrishi’ akinan. Awor, e
palabra ‘tira’ tin diferente konotashon na Papiamentu. Nos mester
suponé ku e sabio no tabatin e konotashon seksual den mente. E tabata
kier men ku ta eksistí otro manera di dera bo lombrishi. En bes di
der’é físikamente den tera di Boneiru, bo por bai bèk te kaminda bo a
nase, kolektá un tiki di e tera kaminda bo lombrishi original ta derá,
bini bèk Boneiru i stroi e tera riba un parti di Boneiru, por ehèmpel
den bo kurá di kas. Di e forma ei b’a ‘tira bo lombrishi’ na Boneiru.
Bo por hasi esaki mentalmente òf físikamente.
Boneriano outóktono
Ya hopi hende a tira nan lombrishi na
Boneiru di e forma aki kaba. Nan ta mesun Boneriano ‘legítimo’ ku esnan
ku a dera nan lombrishi akinan. By the way, e palabra ‘legítimo’ den e
konteksto aki no ta korekto. Nos no por bisa ku hende ku no a dera òf
tira nan lombrishi na Boneiru no ta legítimo. Tur hende ta legítimo.
Úniko kos ku nos por bisa ta ku tin hende outóktono di Boneiru (esnan
ku a dera òf tira nan lombrishi akinan), i tin hende (seguramente
‘legítimo’ tambe) ku ta gusta bishitá Boneiru, pero ku no tin intenshon
di keda.
Tiramentu di lombrishi tin su kompromiso
Tur hende ta
liber (‘vrij’) pa tira su lombrishi na Boneiru, si e ta deseá esei.
Pero e tin su kompromiso (e no ta ‘vrijblijvend’). Si bo ta hasi’é, bo
ta akseptá responsabilidat (huntu ku tur otro Boneriano) pa e bienestar
di Boneiru.